बुधवार, 1 मार्च 2023

होली गीत ( तोषण चुरेन्द्र दिनकर )

आजा तै रधिया बीरीज बन मा ओ 
रंग देहूं तोला अपन रंग मा ओ २
झन तै लुकाना मधुबन  मा ओ
रंग देहूं तोला अपन रंग मा ओ २

तोर बर लाने हावँव मया रंग ला घोर के
झन तैह जाना राधा अइसे मोला छोड़ के
धरे हावँव पींवरा नीला रंग अउ गुलाल ओ
रंगबो रंगाबो दुनो़ फगुआ के हे साल ओ

तैहर आजा हो मोरेच सन मा ओ
रंग देहूं तोला अपन रंग मा ओ २


चंदा अउ सुरूज घलो हमरेच संग हे
धरती अगास जइसे रंगे एके रंग हे
डोंगरी पहाड़ी रुखवा फगुवा राग गावय
कोयली हा कुहकी मारय पुरवा लहरावय

हिरदे के भीतरी मा छागे हे उमंग ओ
रंग देहूं तोला अपन रंग मा ओ२

माते हावय नर नारी सुमत रंग चढ़ाके
अमर होगे तोषण हा होरी गीत  ला गाके 
तोर मोर पीरीत ला जन जन हा गावय
रही दुनिया मा अमर गीत गोहरावय

नाचबो नचाबो गाबो एक धुन मा ओ
रंग देबो सबला अपन रंग मा ओ २

गीतकार 
तोषण चुरेन्द्र " दिनकर "
धनगांव डौंडीलोहारा 
बालोद छत्तीसगढ़ 

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय