का कहिबे
बलदाऊ राम साहू
निस दिन होवत हे निंदा-चारी, का कहिबे
राजा ला सब देवत हे गारी, का कहिबे।
राजा अउ परजा एके नाऊ के मुड़े हे
मुँह मा उनकर बसे हे लबारी, का कहिबे।
पाँच बरस बर चुन के आथे जन सेवा बर
बन जाथे उन बड़का बैपारी, का कहिबे।
छकल-छकल उन करत हावय, जस लूटे बर
जनता के मुड़ मा हावय उधारी, का कहिबे।
अपन सुवारथ बर करजा ले हे मुड़ीभर
आँसू आवत हे छुटे के पारी, का कहिबे।
तैं हर जादा झन सोच 'बरस' मैं काहत हौं
चल जाही तोर उप्पर कटारी, का कहिबे।
-बलदाऊ राम साहू
दुर्ग, छत्तीसगढ़
कोई टिप्पणी नहीं:
एक टिप्पणी भेजें