भेजत हावों दाई मोर
भेजत हावों मैय्या मोर
नेवता हे शीतला तोर नाँव के
आरो ला लेले मोर गाँव के
शीतल रूप तोर शीतला हो मैय्या
गदहा मा आसन लगाये हो मां
ममता के मूर्ति दया के सूर्ती
शोभा बरनी नी जाये हो मां
धोवत हावों मैय्या मोर
धोवत हावों मैय्या मोर
धुर्रा लागे हे तोर पांव के
आरो ला लेले मोर गांव के
रिगबिग रिगबिग जोत जंवारा
चंदा टिकुलिया चमके हो मां
लाल बरन तोर साज सिंगारे
सोनहा सूरूज कस दमके हो मां
रोवत हावों मैय्या मोर
रोवत हावों मैय्या मोर
दे दे आशीष अछरा छाँव के
आरो ला ले ले मोर गांव के
सगरो भगत मन तोर चरन मा
आके माथ नवाये हो माँ
तन में शक्ति मन में भक्ति
सरधा के फूल चढाये हो मां
जोहर हावों मैय्या मोर
जोहर हावों मैय्या मोर
मान ल रखबे मोर गाँव के
आरो ल लेले मोर गांव के
तोषण चुरेन्द्र दिनकर
धनगांव डौंडी लोहारा
कोई टिप्पणी नहीं:
एक टिप्पणी भेजें