सोमवार, 1 जून 2026

तम्बाकू













तम्बाकू


तम्बाकू के संग मितानी, देथे भारी चोट।

धीरे-धीरे तन ला खाथे, जइसे धथुरा घोट।।


गुटखा खैनी बीड़ी मंजन, सब्बो तन के काल।

लइका ला भरमावत हावय, बनके माया जाल।।


मुख मा छाला दाँत बिगड़थे, बोली जाथे हार।

कैंसर जइसे रोग बुलाथे, होथे पीर अपार।।


रुपिया पइसा के बरबादी , मिलथे बस दुत्कार।

घर परिवार दुखी हो जाथे, टूटे सुख संसार।।


डॉक्टर कहिथे मानव संगी, छोड़व ये व्यवहार।

रहिबो स्वस्थ तभे सब बनही, जीवन सुख के द्वार।।


लइका मन बर सीख जरूरी, रखव इला सब दूर ।

आज बचाना हे पीढ़ी ला, मन सोचव भरपूर ।।


तम्बाकू सब छोडे खातिर, नइ लागय कछु देर।

ठानव मन मा छोड़ सकत हव, जीत लेव अंधेर ।।


हरियर जिनगी निर्मल सांसा, पावव बारम्बार।

तम्बाकू ला दूर भगावव, यही हमर गोहार ।।


गाँव-गाँव मा सुमता ठीहा,राखव सदा सजोर।

तम्बाकू के नाश करन बर, मिलके करव अँजोर।।


-तोषण चुरेन्द्र ‘दिनकर’

धनगांव डौंडी लोहारा बालोद छत्तीसगढ़

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय