नइहे महतारी मोर तीर मा, कोनो नइहे संगी मोर।
कोन हा देखही रस्ता ल, कतका होवय भोर।
महतारी के मया ल मँय, कहाँ जाके खोजहूँ।
अपन मन के पीरा ल, ककर करा रोवँहूँ।
दुनिया भर के मया हा, दाई के मया ले छोटे।
ओकर बिन तौ जिनगी के, सबो रस्ता खोटे।
जेकर कोरा मा सुत के, सपना मँय देखत रहेंव।
ओकर अंचल के छाँव मा, सुख के गंगा बोहत रहेंव।
महतारी के आँसू जइसन, कोनो अमृत नइ होवय।
जेकर दाई नइ राहय, ओही मनखे हा रोवय।
सबो देव-देवता मन मा, दाई के मूरत बसथे।
महतारी के असीस ले, किस्मत घलो हँसथे।
खोजत हौं मँय वो हाँसी, खोजत हौं वो दुलार।
दाई बिना मोर घर हा, कस लागे उजार।
मया के सागर आय दाई, कइसे ओला पाहूँ।
मोर महतारी नइहे तीर मा, मँय कहाँ अब जाहूँ।
-तोषण चुरेन्द्र 'दिनकर'
धनगाँव डौंडीलोहारा बालोद छत्तीसगढ़
कोई टिप्पणी नहीं:
एक टिप्पणी भेजें