मंगलवार, 12 मई 2026

​साहित्यिक सहभागिता अऊ रचनाकार के धरम: एक चिंतन

​साहित्यिक सहभागिता अऊ रचनाकार के धरम: एक चिंतन
​भूमिका
कहते हें कि साहित्य समाज के दरपन होथे, फेर उही साहित्य ल जियइया मनखे मन बर साहित्य एक अइसन बगइचा आय जिहां फूल तब खिलथे जब ओला देखइया अऊ सराहइया मनखे मौजूद रहिथें। आज के डिजिटल जुग म, जब फेसबुक, व्हाट्सएप अऊ इंस्टाग्राम के माध्यम ले हमन अपन बात ल दुनिया के आगू रखत हन, तब एक नवा किसम के 'साहित्यिक संकट' पैदा हो गे हे। सवाल ये हे कि— "मैं कखरो रचना ल पढ़ौं नहीं, लाईक नीं करौं, कमेंट नीं करँव त मोर रचना ल कोन पढ़ही?" ये सवाल सिरिपुफ एक झन के नोहे, बल्कि आज के हर नवा अऊ जुन्ना लिखइया के मन म हिलोरा मारत हे।
​साहित्य: एक एकमार्गी रस्ता नोहे
साहित्य साधना अऊ सिर्जन के रस्ता कभू घलघला अऊ एक कोति ले चल्इया रस्ता (One-way road) नहीं होवय। येहा एक संवाद आय। जब एक लेखक लिखथे, त ओहा अपन अंतस के पीरा, खुसी अऊ अनुभव ल सब्द के रूप देथे। फेर वो सब्द मन तब ले सबरथ नहीं होवन, जब तक ओला ककरो आंखी मन न पढ़ंय अऊ ककरो हिरदे म वोहा हलचल न पैदा करय।
​यदि हमन चाहत हन कि हमर रचना ल मनखे मन मान-ग्यान देवें, ओला गुनें अऊ ओकर ऊपर चर्चा करंय, त हमर घलो ये धरम बनथे कि हमन दूसर के मेहनत ल घलो सम्मान दन। बिना पढ़े ककरो रचना ल 'लाईक' कर देना या बिना समझे 'बहुत सुंदर' लिख देना साहित्य के अपमान आय। असली 'साहित्यिक लेन-देन' त उही आय, जिहां हमन दूसर के विचार ल पढ़न, ओकर गुन-दोष ल समझन अऊ अपन प्रतिक्रिया दन।
​संजोग अऊ सकारातमकता के भाव
छत्तीसगढ़ी म एक कहावत हे— "जेकर घर जाबे, तेकर घर ले पाबे।" ये बात साहित्य म घलो लागू होथे। जब हमन दूसर के रचना पढ़थन, त हमन सिर्फ ओला सम्मान नहीं देवत हन, बल्कि हमन खुद घलो सीखत हन। ककरो लिखे के शैली, सब्द चयन अऊ बिचार करे के तरीका हमर खुद के लेखन म निखार लाथे।
​यदि हमन ये सोचबो कि "मैं त बहुत बड़े विद्वान हंव, मोला ककरो रचना पढ़े के जरूरत नहीं हे," त हमन अपन सिर्जन के रस्ता ल खुद रोक देवत हन। अहंकार साहित्यकार के सबले बड़े दुस्मन आय। जब हमन ककरो पोस्ट म कमेंट करथन, ओकर हौसला बढ़ाथन, त हमन एक अइसन रिश्ता बनाथन जेकर बुनियाद 'साब्द' अऊ 'भाव' म टिके रहिथे। कल के दिन जब हमन कुछु लिखबो, त उही मनखे मन अपन अपन लगाव के कारण हमर रचना ल घलो रुचि ले पढ़हीं।
​डिजिटल जुग अऊ हमर जिम्मेदारी
आज के समय म रचनाकार मन के बाढ़ आ गे हे। हर मनखे लिखत हे, फेर पढ़इया मन के कमी हो गे हे। सबो ल अपन रचना सुनाय के हबक हे, फेर ककरो सुने के धीरज कोनो करा नहीं हे। अइसन म छत्तीसगढ़ी साहित्य के विकास कइसे होही?
​छत्तीसगढ़ी भासा ल अऊ आगू ले जाय बर हमन ल एक-दूसर के 'संवाहक' बनना परही। यदि कोनो नवा लइका ह छत्तीसगढ़ी म कविता लिखत हे, त ओला नीचा देखाए के बदला ओकर सब्द मन ल सुधारना अऊ ओला शाबासी देना हमर जिम्मेदारी आय। यदि हमन अपन छत्तीसगढ़ी भासा के रचनाकार मन ल 'लाईक' अऊ 'कमेंट' के माध्यम ले सहारा नहीं देबो, त ओ मनखे धीरे-धीरे हताश हो जही अऊ लिखना छोड़ दहि। अऊ आखिर म नुकसान हमर भासा के ही होही।
​संवाद के कमी के परिणाम
यदि हमन अपन आप म सीमित रहिबो, त हमर रचना घलो सीमित हो के रह जही। कोनो घलो रचना तब अमर होथे जब वोहा चर्चा के बिषय बनथे। चर्चा तब होथे जब कोनो ओला पढ़थे। यदि हमन दूसर के रचना म रुचि नहीं देखायन, त हमन अपन आसपास एक अइसन "साहित्यिक दीवार" खड़ा कर लेथन, जेला पार करके कोनो हमर करा नहीं आय।
​एक लेखक बर सबले बड़े इनाम ओकर पाठक के प्रतिक्रिया होथे। जब कोनो पाठक लिखथे कि— "तुहर ये बात मोर मन ल छू गे," त लेखक के हताशा दूर हो जथे अऊ ओला नवा ऊर्जा मिलथे। ये ऊर्जा के चक्र ल बनाए रखना हमर हाथ म हे।
​निष्कर्ष
साहित्य सेवा ह दान जइसन आय। जिहां हमन अपन समय अऊ बिचार दान करथन। "कोन पढ़ही?" के चिंता ले अच्छा हे कि हमन खुद "पाठक" बनन। जब हमन एक अच्छे पाठक बनबो, त हमन ल अपन आप अच्छे पाठक मिल घलो जहीं।
​छत्तीसगढ़ी साहित्य ल समृद्ध बनाए बर हमन ल 'अपन' अऊ 'तोर' के भावना ल त्याग के 'हमन' के भावना ल अपनाय बर परही। ककरो रचना म कमेंट करना सिरिपुफ ओला खुस करना नोहे, बल्कि छत्तीसगढ़ी महतारी के सेवा म एक दीया जलाय के बराबर आय।
​अत: ये बात गांठ बांध ले बर चाही कि— साहित्य के रथ ह दू पहिया म चलथे, एक पहिया लिखइया (लेखक) के आय त दूसर पहिया पढ़इया (पाठक) के। यदि हमन दूसर के पहिया बनबो, तबे कोनो हमर पहिया बन के हमर रचना के रथ ल समाज म आगू बढ़ाही।
​आओ, हमन संकल्प लन कि हमन अपन छत्तीसगढ़ी भाई-बहिनी मन के रचना ल पढ़बो, ओकर सराहना करबो अऊ एक सकारातमक साहित्यिक माहौल बनाबो। तभे जाके छत्तीसगढ़ी साहित्य के झंडा दुनिया म ऊंच उझियाही।
​जय जोहार, जय छत्तीसगढ़!

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय