गुरुवार, 26 मार्च 2026

पेड़

छंद -आल्हा ,विषय- पेड़


पेड़ लगावव जुरमिल संगी, अमरित छइँहा हे बगराय।
पानी बादर झुरझुर लाये, धरती कोरा हे हरियाय।।1।।

पेड़ बिना हे जग ये सुन्ना, संत सुजानिक करव बिचार।
हावा पानी कइसे पाबो, होवत हावय हाहाकार।।2।।


पेड़ लगाथँन कहिके भइया, दे मारे फोटो खिचवाय।
बिन पानी सब सुन्ना दीदी,लगे पेड़ ला कोन बचाय।।3।।

पेड़ बचावय जिनगी सबके, चेत करव सब मीत मितान। 
हरियर धरती के कोरा मा, आही तब तो नवा बिहान।।4।।

धरती हरियर दुनिया हरियर, मानव संगी मोरो बात।
हावा पानी मिलही ताजा, होही जब झुरझुर बरसात।।5।।

-तोषण चुरेंद्र दिनकर धनगांव डौंडी लोहारा बालोद छत्तीसगढ़ 


कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय