विश्व वंदनीय भारत माता के दुलौरिन बेटी छत्तीसगढ़, जेकर कोरा म बसे बालोद जिला जिंहा डौंडीलोहारा ब्लाक के एकठन आदिवासी बाहुल्य क्षेत्र अउ घनघोर जंगल मिंझराहट म बसे पावन गांव धनगाँव हे । जिंहा खरखरा झरझरा के निर्मल पानी म धनगांव ह आठो काल बारो महिना नँहावत रथे। जेकर परसादे धनहा भुँइया खेती डोली नदिया नरवा लहरावय रहिथे। बाबा बिकटराव जोगी राव दैतराव माता शीतला ठाकुर देव सहित हजारों देवी देवता के आशीर्वाद मया दुलार भरत पूरत रहिथे। सब किसान भाई मन के कोठी मा अनपूरना दाई के भंडार भरे रहिथे। अइसन गांव धनगाँव के एकझन दुलरवा बेटा तोषण कुमार चुरेन्द्र के संघर्ष के नानचुन कहानी।
२८ जून १९८४ म मध्यम परिवार के कुंवर सिंह के बेटा जोहर लाल चुरगिया घर जनम धरिस। महतारी श्रीमती कलिन्द्री बाई चुरगिया । बहिनी ललिता सरिता अउ तुलेश्वरी । भाई बहिनी म सबले बड़का तोषण। जेकर प्राथमिक शिक्षा धनगांव अउ माध्यमिक उच्चतर माध्यमिक शिक्षा डौंडीलोहारा मा होईस । २००३ म महतारी के देहावसान के बाद शिक्षा ल रोक के परिवारिक जिम्मेदारी के चलत भिलाई महाराष्ट्र मा खाय कमाय बर घलक गैरिहिस। उहां ले आके साल भर चाय नाश्ता होटल घलक चलाईस। गांव म उधारी बाढ़ी के देखत होटल ढप खागे। २००६ म चित्ररेखा बाई संग बिहाव होगिस। २००७ म सबले बड़े बेटा डुमेश जनम आईस। २००८ मे सरस्वती शिशु मंदिर डौंडीलोहारा म आचार्य (शिक्षक) पद म रहत लइका मन पढ़ावत ज्ञान बगरावत लगातार संघर्ष करत साहित्य, गायन, वादन, उदघोषक, रामायण, रामलीला ,लोकमंच सहित अन्य क्षेत्र म भी अपन योगदान देवत हे। २०१९-२० म राजयोग के चलत सरपंच के चुनाव म जीत हासिल करके जनता जनार्दन के आशीर्वाद ले के ,सुख दुख के गाड़ी म बैठ के सरपंच पद के दायित्व के निर्वहन २०२४-२५ तक निभइस हे। १ दिसम्बर २०२४ के छोटे बेटा कौशिक के जनम आईस हे । अभी वर्तमान म तहसील समन्वयक तुलसी मानस प्रतिष्ठान ईकाई डौंडीलोहारा, उपाध्यक्ष मधुर साहित्य परिषद ईकाई डौंडीलोहारा,व्याख्याकार व अध्यक्ष जय श्री राम मानस परिवार धनगाँव, गीतकार साहित्यकार के रूप म अपन छाप ल बरकरार रखे हे। अउ जीवन पर्यंत समाजिक ,साहित्यिक, राजनीतिक सहित थोरिक थोरिक सबो क्षेत्र म अपन योगदान देवत हे।
कोई टिप्पणी नहीं:
एक टिप्पणी भेजें