बनवासी होगे रे राजा,दाई ददा के बात मान के
भाई साथी होगे रे राजा, दाई ददा के बात मान के
दाई ददा के बात मान के होऽ ओऽ
दाई ददा के बात मान के
केंवट ला मांगे डोंगा हे रघुवर,जाए बर गंगा पार गा
चरण पखारे किरपा ला पाये,पुरखा ला डारिस उबार गा
गोठ अटपटहा केंवट के सुने, मुस मुस मुसले हाँस के
देखे सीता अउ भाई लखन ला, ऊपर नजर ला टाँस के
संगी साथी होगे हो रामा,दाई ददा के बात मान के
भाई साथी होगे रे राजा, दाई ददा के बात मान के
चौदा बच्छर ले बन मा रहिबे, कांदा कुसा ला तैं खाके
कते जंगल अउ कते झाड़ी मा, परनकुटी ला बनाके
राजमहल के तैहा रहैय्या, ओतिक कहां सुख पाबे
कहूं करा ले घुमरत किंदरत, लहुट के घर तैं आबे
पुरवासी रोवै हो रामा,दाई ददा के बात जान के
भाई साथी होगे रे राजा, दाई ददा के बात मान के
बुढ़वा जटायु ला हाथ मा तारे, ददा बरोबर तै जानें
बोईर ला खाके जूठा शबरी के,दाई बरोबर तै मानें
पांव पखारै मूरत निहारै,मन मा राखै प्रभु ध्यान ला
धन्य हे शबरी तोर जीवन ला,पाएहस नवधा ज्ञान ला
घट घट वासी होगे रामा,दाई ददा के बात मान के
भाई साथी होगे रे राजा, दाई ददा के बात मान के
तोषण चुरेन्द्र 'दिनकर'
धनगाँव डौंडी लोहारा बालोद छत्तीसगढ़
कोई टिप्पणी नहीं:
एक टिप्पणी भेजें