भइया आवत होही लेनहार मोर,एसो जाहूं तीजा बर मंय मइके
दाई देखत होही पाटी पार मोर,एसो जाहूं तीजा बर मंय मइके
संगी जहुंरिया संग सकलाबो,मया पीरा के गोठ गोठियाबो
घेरी बेरी सुरता करके,ओली ओली मया भरके
भइया आवत होही लेनहार मोर,एसो जाहूं तीजा बर मंय मइके
गांव के तरिया गांव के पनघट,रही रही सुरता आवय
सावन झूलवा काशी के फूलवा,सोच के मन गुदगुदावय
घोर घोर रानी अउ घरबुंदिया,पोरा के नदिया बइला चुकिया
घेरी बेरी सुरता करके,ओली ओली मया भरके
भइया आवत होही लेनहार मोर,एसो जाहूं तीजा बर मंय मइके
दाई के लुगरा मया के अचरा,ददा के डांटे फटकार
पारा परोसीन करे ठिठोली,बांटे बड़ मया अउ दुलार
मया पीरीत के निर्मल छंइहा,नाचबो गाबो जोरे जोरे बंइहा
घेरी बेरी सुरता करके,ओली ओली मया भरके
भइया आवत होही लेनहार मोर,एसो जाहूं तीजा बर मंय मइके
पति बर पूजा देव न दूजा,शिव भोला ल मनाबो
अमर रहे मोर मांग के सेंदूर,वर हम अतरिच पाबो
तीजा के तिहार हे,खुशियां अपार हे
घेरी बेरी सुरता करके,ओली ओली मया भरके
भइया आवत होही लेनहार मोर,एसो जाहूं तीजा बर मंय मइके
तोषण चुरेन्द्र 'दिनकर'
धनगाँव डौंडी लोहारा बालोद छत्तीसगढ़
कोई टिप्पणी नहीं:
एक टिप्पणी भेजें