आगे आगे हरेली तिहार रे संगी
भुंइया के जागे भाग रे संगी
भुंइया के जागे भाग
---धरती दाई के हरियर अचरा, जइसे के सोलहो सिंगार रे संगी
भुंइया के जागे भाग
१
नदिया नरवा डोंगरी पहाड़ी,
झरना झर झर गावय
झूमय नाचय ताल तलइय्या,
रूख राई इतरावय
---सावन महिना छागे हरेली,
माते हावय खेती खार रे संगी
भुंइया के जागे भाग
२
नाँगर बइला खुम्हरी कमरा,
दसमूर कस हे मितानी
धरती दाई ल अर्चन बंदन,
करथन खेती किसानी
---नवकइना मन झूलय झूलवा,
गावय सवनाही राग रे संगी
भुंइया के जागे भाग
३
लीम के डारा दसमूर पाना,
घर अंगना म लगावय
रापा गैंती संग मा कुदारी,
गुरहा चीला ल पावय
---लोग लइका मन साजे गेंड़ी,
भागय पल्ला ले धार रे संगी
भुंइया के जागे भाग
४
रूखवा लगाले करले जतन गा,
इही संदेश बगरावय
हरियर हरियर हमर ये भुंइया
लहर लहर लहरावय
---रिमझिम रिमझिम बरसे बदरा,
करे मया के बउछार रे संगी,
भुंइया के जागे भाग
तोषण चुरेन्द्र 'दिनकर'
धनगाँव डौंडी लोहारा बालोद छत्तीसगढ़
४९१७७१
६२६७५३८०३६//९५७५०७०६८९
कोई टिप्पणी नहीं:
एक टिप्पणी भेजें