रविवार, 12 मई 2024

मोला मया हे





















का---
मोला मया हे गोरी तोर ले भारी,
ये मया के चिन्हारी, दे देहूं तोला मया के मँय ह मुंदरी।

की---
मोला मया हे राजा तोर ले भारी,
ये मया के चिन्हारी, दे देबे मोला  मया के तँय ह मुंदरी।
(१)
का---
मिरगीन कस रेंगना तोर,दिल ल लुभावय ओ
ले डारे गोरी मोर जान तँय

की---
का जादू डारे राजा,मन ल मोही डारे रे,
नैना के अइसे मारे बान तँय

का---
दुनों मया के कुरिया बसाबो,
ये जिनगी पहाबो,दे देहूं तोला मया के मँय ह मुंदरी

(२)
की---
घमके अमरइय्या, कुहके कोयलिया,
बइरी पवन इतरावय हो

का---
मन के मिलौनी,दिल के तँय जोगनी,
भँवरा मन गुदगुदावय हो

की---
लेके बाजा अउ बैंड बराती, 
ये सुकवा पहाती,दे देबे मोला मया के तँय ह मुंदरी

(३)
का---
एसो के अकती मा, भाँवर पराबोन ओ,
दिल मा तँय राखे रहिबे धीर

की---
हावय भरोसा राजा, मया म तोर गा,
रहि रहिके उठे मया पीर

का---
मोर भरोसा ल तँय राखे रहिबे,
कोनहों झन कहिबे,दे देहूं तोला मया के मँय ह मुंदरी

©®
तोषण चुरेन्द्र 'दिनकर' 
धनगांव डौंडीलोहारा बालोद छत्तीसगढ़

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय