गुरुवार, 9 मई 2024

मोरो बिहा करा देना


एसो मोंरो बिहा बिला ल करा देना गो...

ए दाई  ए दाई ए दाई ओ
ए भौजी  ए भौजी ए भौजी ओ
एसो मोंरो बिहा ल करा देना गो २
--दुबर राहय चाहे राहय मोठल्ली
मोला खवाही काजू मूंगफल्ली
कुछु तो चक्कर चला देना गो....

ए दाई....
(१)
कब ले घुमत राहूं मैंहा कंवारा
संगी संगवारी के बनगेहे सारा
आरा पारा नोनी बाबू खेलाहूं
मन के मोर मैना ल फिलिम देखाहूं
--घेरी बेरी तुंहर पाँव परत हँव
मानी जाना अरजी बिनती करत हँव
कुछु तो चक्कर चला देना गो....

ए दाई....
(२)
मया के मोर बर कुरिया बसादे
चंदा कस चुकले घरवाली ल लादे
पड़की परेवना कस फुदकत रहिबो
घन अमरइया कोयली कस कुहकत रहिबो
--गोरी राहय चाहे बिरबिट कारी
बनके रही मोर संग संगवारी 
कुछु तो चक्कर चला देना गो....

ए दाई....
(३)
कलपत हे चोला मन नइ माने
दिल के दरद ल कोनों नइ जाने
करत हों अरजी मोरो तैं सुनले
का होथे पीरा मोरों तैं गुनले
--का मैं एसो फेर ठाढ़े सुखावंव
का करी डारेंव कोन ल बतावंव
कुछु तो चक्कर चला देना गो..…

ए दाई....

©®
तोषण चुरेन्द्र 'दिनकर' 
धनगांव डौंडीलोहारा 
बालोद छत्तीसगढ़ 
१०/०५/२०२४ अपरान्ह १२:०३

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय