सोमवार, 1 जनवरी 2024

मोला पगला बनाये

का- मोला पगला बनाये ओ गोरी तोर चमचम माथ के बिंदिया 

ये दिवाना बनाये ओ गोरी तोर चुटकी पांव के बिछिया

मोला पगला बनाये ओ,ये दिवाना बनाये ना 

मोला पगला....

ये दिवाना.....


की- दिल मा छुरी चलाये गा दिवाना तोर तिरछी ये नजरिया

तन मा आगी लगाये गा रे मोहना बाली मोर उमरिया

दिल मा छुरी चलाये ना,तन मा आगी लगाये ना

दिल मा....

तन मा....


का- आंखी मा झूले तोर सुरतिया,मिरगीन तोर रेंगना भावय

चढ़ती जवानी हे तोर दिवानी, मन ला मोर गुदगुदावय 

की- तोर सुघराई मा होगेंव दिवानी,करँव का तही बताना

बही बरन मँय किंजरत रहिथँव,हाँसत हे सारा जमाना 

का तै मोहनी खवाये रे,का तै जादू चलाये ना

का- मोला पगला....

      ये दिवाना.....



का- नींद नइ आवय रतिहा बइरी,सुरता हा तोरे सताथे

अनपानी मोला कछु नइ भावय,रतिहा निचट पहाथे 

की- का मोहनी मोला डारे रे बइहा,सुध बुध सबो भुलागे

पागा के कलगी मा तोर रे राजा,मन हा मोरो बँधागे

नैना बान चलाये रे,मोर मन भरमाये ना

का- मोला पगला...

      ये दिवाना....



का- गड़वा बाजा धरके आहूं,दुलहिन तोला बनाहूं

चंदा सूरुज ह हमर गवाही,सात भांवरी भँवराहूं

की- संग नइ छूटे छूटे जमाना,संग जीबो मरजाबो

जुग जुग रही हमर मया ह,गीत मया के गाबो

संग जिनगी पहाबो ना,मया पीरीत बढ़ाबो ना

का- मोला पगला...

      ये दिवाना....


की- दिल मा छुरी

       तन मा आगी



©® गीतकार 

तोषण चुरेेन्द्र दिनकर धनगांव डौंडीलोहारा बालोद छत्तीसगढ़ 


कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय