कब आबे मोर राजा राम
करँव अगोरा आमा छाँव मा
तोर रद्दा मा फूल बिछावँव,
घेरी बेरी तोर सुरता लमावँव
झन काँटा गड़े तोर पाँव मा....
आँखी मोर पथरा होगे,
करत तोर निहोरा मा
गंगा जल ला भरके रखे हँव,
कठवा के कठौता मा
करेजा भीतरी तोला बइठारँव,
तोर मोहनी सुरतिया निहारँव
कब आबे प्रभु मोर ठाँव मा....
तोर दरस के आस हावय,
अरजी मोरो तँय सुन ले
आनी बानी के काँदा कुसा
राखे हावँव चुन–चुन ले
चिरई चिरगुन ला मँय हा हिकारँव,
आजा आवत हे राम पुकारँव
बड़ जादू भरे जेकर पाँव मा...
पुरखा मोरो तर जाही गा
एक घाँव पँउरी धो वाले
बीच मझधार हे मोरो डोंगा
भवसागर पार लगाले
तोर भक्ति ला मँय हा पावँव,
दिन राती तोला गुनगुनावँव
तोषन कहिथे गाँव-गाँव मा....
तोषण चुरेन्द्र दिनकर
धनगांव डौंडीलोहारा बालोद छत्तीसगढ़
कोई टिप्पणी नहीं:
एक टिप्पणी भेजें