गणेश बंदना
गौरी के गणराज गजानन,महिमा गजब तोर भारी
दुनिया म होथे पहिली पूजा, हावस तैं हितकारी
जय हो जय हो गजानन,तोर पंइया लागँव
जय हो जय हो गजानन,तोर गुन ला गावँव।
पान चढ़ावँव फूल चढ़ावँव,अउ हे लड्डू कलेवा,
भाव भजन मैं कछु नइ जानँव,स्वीकरव मोर सेवा
अंधरा के तै आंखी बनथस,कोढ़ी ल देथस काया
लंगड़ा के बैसाखी तैंह,निरधन बर हस माया
कोन अमीर हे कोन गरीब हे,कोनों नइहे चिनहारी
दुनिया म होथे पहिली पूजा, हावस तैं हितकारी
जय हो जय हो गजानन,तोर पंइया लागँव
जय हो जय हो गजानन,तोर गुन ला गावँव।
शंकर सुत हे गनपति देवा,मुसवा के करे सवारी
सुपा बरोबर कान हे भगवन,पेट अबड़ हे भारी
गजमुख सोहे मन ला मोहे,बल बुद्धि के देवइय्या
रिद्धि सिद्धि तोर सेवा बजावै ,पार्बती तोर मइया
तोर सेवा मा सब कोई आवै,झूम गावत नर नारी
दुनिया मा होथे पहिली पूजा, हावस तैं हितकारी
जय हो जय हो गजानन,तोर पंइया लागँव
जय हो जय हो गजानन,तोर गुन ला गावँव।
भादो के महिना चउथ के दिन ले,गाँव गली मा बिराजे
तोर सेवा मा ग्यारा दिन ले,ढोल नँगारा हा बाजे
एकदंत हे दयावंत मोर,बिगड़ी प्रभु बनादे
दीन दुखी हँव तोर शरन मा,भाग ला मोरो जगादे
तोसन के सिर हाथ ल रखदे,वरदे जग बलिहारी
दुनिया म होथे पहिली पूजा, हावस तैं हितकारी
जय हो जय हो गजानन,तोर पंइया लागँव
जय हो जय हो गजानन,तोर गुन ला गावँव।
गीतकार: -
तोषण चुरेन्द्र दिनकर धनगांव डौंडी लोहारा बालोद छत्तीसगढ़
कोई टिप्पणी नहीं:
एक टिप्पणी भेजें