तोर बिना जोही मोला आवय नहीं चैना
दिन मोरो बीते नहीं कटे नहीं रैना
आजा रे मोर चंदा रानी ओ
लिखबो दुनों मया कहानी ओ
सपना तोर आथे रानी रतिहा सताथे
मुच मुच हाँसी तोर जिवरा जराथे
कब तैं आबे गुंइया जिनगी मा मोर
देखँव निहोरा करत रद्दा ला तोर
बोली तोर लागे जइसे कोयली बैना
दिन मोरो बीते नहीं कटे नहीं रैना
आजा रे मोर चंदा रानी ओ
लिखबो दुनों मया कहानी ओ
तोला अगोरँव मैं नदिया कछार मा
मोहनी मुरतिया बसे हे तोर आंखी करार मा
संगी जहुंरिया मन मारै गोरी ताना
कब ले तरसाबे मोला तही हा बताना
तै मोर आंखी पुतरी मैं हँव तोर ऐना
दिन मोरो बीते नहीं कटे नहीं रैना
आजा रे मोर चंदा रानी ओ
लिखबो दुनों मया कहानी ओ
तोषण चुरेन्द्र 'दिनकर'
धनगांव डौंडीलोहारा
बालोद छत्तीसगढ़
९५७५०७०६८९
कोई टिप्पणी नहीं:
एक टिप्पणी भेजें