धरती मइय्या के रतन बेटा
तै कमइय्या किसान गा।
कइसे करम तोर लिखे बिधाता
नंइहे तोर अब पहिचान गा।
भुंइया ला चीर सोना उगाथस
जांगर तोड़ पसीना ओगराथस
रात अउ दिन महिनत करथस
झोंक देथस तै परान गा.....
कइसे करम तोर लिखे बिधाता
नंइहे तोर अब पहिचान गा....
लोग लइका संग रहे सुवारी
नाँगर बइला तोर संगवारी
लह-लह करथे खेती डोली
बोंलेथस तै जब धान गा...
कइसे करम तोर लिखे बिधाता
नंइहे तोर अब पहिचान गा...
कर्जा बोड़ी मा खाँध लदागे
घानी कस जिनगी हा पेरागे
कइसे तोर जिनगी हा चलही
मन होगे हलकान गा...
कइसे करम तोर लिखे बिधाता
नंइहे तोर अब पहिचान गा...
कतको किसनहा झूलके मरगे
चिंता फिकर मा हाँड़ा घुरगे
बिनती हावय सरकार ले हमरो
थोरकिन देवय ध्यान गा...
मान मिले सम्मान मिले अउ
झूमे नाचय किसान गा...
धरती मइय्या के रतन बेटा
तै कमइय्या किसान गा।
कइसे करम तोर लिखे बिधाता
नंइहे तोर अब पहिचान गा।
तोषण चुरेंद्र दिनकर
धनगाँव डौंडी लोहारा
कोई टिप्पणी नहीं:
एक टिप्पणी भेजें