---<<<०००: छेरिक छेरा छेरछेरा :०००>>>---
{ छत्तीसगढ़ी-सार छन्द }
०×××××××०
पूस महीना के हे पून्नी , धरम-करम के बेरा ।
छेरिक छेरा माँगन दाई , दिहा झट छेरछेरा ।।
बछर दिन म हे आये हावन , दाई तुँहर दुवारी ,
लैका-सियान मिलके देखव , सुन लेवा महतारी ।
कोठी के हे धान ल दाई , सूपा - सूपा हेरा ।।
छेरिक छेरा माँगन दाई , दिहा झट छेरछेरा ।।१।।
हमन भिखारी मैया नोहन , जोगी-बाह्मन-बावा ,
दू - दी ओंजरा धान देके , भारी पुन्य कमावा ।
घर म अन कुवाँरी तुँहर भरे , हरदम करे बसेरा ।।
छेरिक छेरा माँगन दाई , दिहा झट छेरछेरा ।।२।।
साकम्भरी जगत के जननी , सबके पालनहारी ,
परगट होइन आज भवानी , सबके मंगलकारी ।
भूखा मन के भूख मिटाइन , दुःख-कसट के बेरा ।।
छेरिक छेरा माँगन दाई , दिहा झट छेरछेरा ।।३।।
उँकर नाम ले धान ल दे दा , दिहा तभे तूँ पाहू ,
देके दान सुजसकर लेवा , एला घला कमाहू ।
सब्बो जीव तुँहर आसा हे , करथें साँझ-सबेरा ।।
छेरिक छेरा माँगन दाई , दिहा झट छेरछेरा ।।४।।
सब्बो किसान भगवान सहीं , साधे हाथ किसानी ,
धरती के बेटा कहलाथें , देथें दाना - पानी ।
जमा किसानिन जैसे लछमी , जल्दी थान ल हेरा ।।
छेरिक छेरा माँगन दाई , दिहा झट छेरछेरा ।।५।।
जियत रहे ले फेर बछर के , तुँहर दुवारी आबो ,
जल्दी-जल्दी बिदा करव माँ , आन दुवारी जाबो ।
कहिथे 'ठाकुर' परब छेरछेरा , हवय दान के बेरा ।।
छेरिक छेरा माँगन दाई , दिहा झट छेरछेरा ।।६।।
०××××××०
दि.१५.०१.२२--जगतसिंह ठाकुर 'बंजारीवाले'
९४०६०५७७६३ , ६२६६५२४२६१
कोई टिप्पणी नहीं:
एक टिप्पणी भेजें