🌹कविता 🌹
छेरछेरा के तिहार
छत्तीसगढ महतारी के कोरा म,
लछमी दाई के बसेरा हे ।
पुस पुन्नी के महिना आगे ,
चलव संगी आज छेरछेरा हे ।
कोनो हा धर लेबो झोरा ,
त कोनो बोही लेबो कांवर ।
लॅइका सियान जम्मो किंदरबो ,
गांव म छेरछेरा के भांवर ।।
ओधे कपाट ल पेल के निंगबो ,
आज माई कोठी के धान ल हेरहेरा हे ।
पुस पुन्नी के महिना आगे ,
चलव संगी आज छेरछेरा हे ।।
कोनो घर दिही खोंची - खोंची,
कोनो घर ठोमहा - ठोमहा ।
कोनो घर दिही पसर - पसर ,
चल किंदरबो ओनहा - कोनहा ।।
हमर छत्तीसगढ महतारी के,
मॅय कतका करवॅ बड़ाई ।
सुपा - सुपा देवत हे,
हमरो घर डोकरी दाई ।।
दुनिया म तॅय कतको कमाले ,
फेर आज दान करे के बेरा हे ।
पुस पुन्नी के महिना आगे ,
चलव संगी आज छेरछेरा हे ।।
✍️चुरामन साहू ग्राम कसही
पोस्ट टटेंगा जिला बालोद छ ग 🙏
🌹मो 89640-22051 🌹
कोई टिप्पणी नहीं:
एक टिप्पणी भेजें