शुक्रवार, 9 अक्टूबर 2026

झूपत झूपत झूपत आबे


झूपत झूपत झूपत आबे दाई
नाचत नाचत नाचत आबे ओऽऽ
सातो बहिनिया ल, भैरव लंगुरवा ल,खेलावत लाबे ओ
झूपत झूपत झूपत आबे दाई
नाचत नाचत नाचत आबे ओऽऽ

तोर मंदिर म दाई,जँवारा बोवायें हे
नवकरसा म मईया,जोत जलायें हे
गजमोतियन के दाई,चँऊक पुरायें हे
चंदन पिढ़ुलिया माता, आसन लगायें हे
भेजत हँव नेवता ल,मोर ठाकुर देवता ल,बलावत लाबे ओ
झूपत झूपत झूपत आबे दाई
नाचत नाचत नाचत आबे ओऽऽ

चैत-कुंवार महिना,मेला भराये ओ
दरसन पाये खातिर,नर-नारी आये ओ
लाली-लाली साज सिंगारी,तोर बर लाये ओ
मन के मनौती माने,जग हरसाये ओ
महिना मधुमास ल, भक्तन के आस ल,पुरावत जाबे ओ
झूपत झूपत झूपत आबे दाई
नाचत नाचत नाचत आबे ओऽऽ

डेहरी म आएँव दाई,दरस देखाबे तैं
जोहर तोसन के मईया,भाग जगाबे तैं
ममता के अचरा दाई, सब ल ओढ़ाबे तैं
अपन भगत ल माता,झन तरसाबे तैं
पाँव के पैरी ल,हाथ के चुरी ल,छनकावत आबे ओ
झूपत झूपत झूपत आबे दाई
नाचत नाचत नाचत आबे ओऽऽ

गीतकार 
तोषण चुरेन्द्र 'दिनकर' 
धनगांव डौंडीलोहारा बालोद छत्तीसगढ़ 
9575070689

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय