शुक्रवार, 9 अक्टूबर 2026

छोटकू चिटरा बाल कविता

बाल कविता 

 *छोटकी चिटरा*

छोटकी चिटरा फुदक-फुदक के,
दौड़त जाथे कुदक-कुदक के।
झबरा पूँछ हिलावत जाथे,
देखत-देखत मन हरसाथे।
लीम के डारा ऊपर चढ़थे,
कभू उतरके खाल्हे पड़थे।
दाना खोजे इहाँ-उहाँ ले,
लुकाय झटपट फेर तहाँ ले।
हम ला देख के भागे झटपट,
झाँके धीरे-धीरे सटपट।
हमन ओला मीत बनाबो,
दाना देके मया बढ़ाबो।
जीव-जंतु सब संगी होही,
धरती म खुशहाली होही।
मिल-जुल के प्रकृति बचाबो,
सुंदर दुनिया सरग बनाबो।

 *बरखा रानी*

बरखा रानी आथे रे,
टप-टप पानी लाथे रे।
करिया बादर अगाश छाइस,
भुइयाँ म मुस्कान बगराइस।
मेंचका टर्र-टर्र गाना गावय,
मँजूर नाचत पंख फुलावय।
नदिया-नरवा भर गे पानी,
हरियर होगे खेत-खलिहानी।
कागज के हम डोंगा बनाबो,
पानी म ला के तैराबो।
छप-छप करत खेलन जाबो,
बरखा रानी ला मनाबो।
माटी के खुशबू मन ला भावय,
जूड़ पूरवइया मन सहलावय।
बरखा रानी लगथे प्यारी ,
सबके मन म खुशी हे भारी।

 *चलव संगी स्कूल*

चलव संगी स्कूल चलव,
हँसत-गावत संग म चलव।
बस्ता धरके पीठी ऊपर,
मन के सपना गढ़े चलव।
गुरुजी हम ला पाठ पढ़ाथें,
मीठ-मीठ गोठ समझाथें।
गिनती, कविता, खेल-कूद,
नवा-नवा रोज सीख सिखाथें।
टिफिन खोल के संग म खाबो,
एक-दूसर ले मया बढ़ाबो।
स्कूल हमर मंदिर जइसन,
ज्ञान के जोती मिलके जलाबो।
पढ़-लिख के होबो होशियार,
करबो अपन गाँव के उपकार।
मेहनत करके आगू बढ़बो,
देश म होही नाँव उजियार।

 *ननकी चिरई*

ननकी चिरई चूँ-चूँ गावय,
होवत बिहना ले आवय।
डार म बइठे पंख फुलाय,
फुर्र-फुर्र करके उड़ी जाय।
दाना चुगे बर डेरा डारे,
फेर उड़ जाये पंख पसारे।
कभू बइठे लीम के डारा,
कभू उड़ जाथे खेत किनारा।
नान्हे चोंच म दाना धरके,
लइका मन ला देथे भरके।
हमन दाना रोज खवाबो,
चिरई संग म मया बढ़ाबो।
जीव-जंतु सब हमर संगी,
इनकर दुनिया हे सतरंगी।
मिल-जुल के सब ला बचाबो,
धरती सुंदर सरग बनाबो।

 *चीला रोटी*

चीला रोटी गरम-गरम,
खाबो संगी नरम-नरम।
मोर दाई हा चीला बनाय,
सुग्घर खुशबू घर म बगराय।
चाँउर पीस के घोल बनाय,
नून-मरिच ला संग मिलाय।
तावा ऊपर घोल पसारय,
घींव डारके झनक सँवारय।
गोल-गोल चीला मुस्काय,
देखत मन हा ललचाय।
ददा कहय—“मोला घलो दे”,
भैया कहय—“एक मोला दे!”
सबो संगी संग म खाबो,
हँसत-गावत मजा उड़ाबो।
चीला रोटी हमर पहिचान,
छत्तीसगढ़ के मीठ मिठान।

तोषण चुरेन्द्र 'दिनकर'
धनगांव डौंडीलोहारा बालोद छत्तीसगढ़ 
9575070689

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय