माला नवदुर्गा तोर नाँव के
फेरत हवों माला ओ दाई,
नवदुर्गा तोर नाँव के
बरे जगजोती,नवदिन राती,
करौं बंदना, सुकवा पहाती
पइयाँ परथौं तोर पाँव के,
पइयाँ परथौं तोर पाँव के
तोर दिए काया पाँच रतन के
रखे हस दाई तही जतन के
ननपन ले तैंह गोरस पियाए
धरे अँगरी दाई रेंगना सिखाए
बनके छइहाँ थाम के बइहाँ
रस्ता बताये तोर ठाँव के
पइयाँ परथौं तोर पाँव के
तोर लागा ल कइसे छूटाहूँ
तोला छोड़ कहाँ मैं जाहूँ
नइ जानँव तोर भाव भजन ल
कइसे मैं गाहूँ गीत गजल ल
नैना बिछाए आस हे लगाए
भगत अगोरे मोर गाँव के
पइयाँ परथौं तोर पाँव के
हवों तोर लइका दरस देखादे
जोहर तोसन के भाग जगादे
झाँझ मंजीरा बाजे नँगारा
नाचय गावय झूमे संसारा
हे महामाई हे बमलाई
शीतला ओ शीतल छाँव के
पइयाँ परथौं तोर पाँव के
तोषण चुरेन्द्र 'दिनकर'
धनगांव डौंडीलोहारा बालोद छत्तीसगढ़
9575070689
कोई टिप्पणी नहीं:
एक टिप्पणी भेजें