छत्तीसगढ़ निहाल (सरसी छंद)
भारत माता के हे बेटी, छत्तीसगढ़ निहाल।
मस्तुरिहा अउ सुंदर शर्मा, जइसे हावय लाल।।
छत्तीसगढ़ी बोली भाखा, अरपा पैरी धार।
लिखव पढ़व सब जुरमिल संगी, पारत हँव गोहार।।
लहरावत हे जेकर अचरा, धान सोनहा जोर।
पुरवइया इतरावय सुग्घर, नदिया करे हिलोर।।
बीर नरायन बाँका बेटा, जग मा नाम कमाय।
दीन दुखी के रक्षा खातिर, खुद के प्राण लुटाय।।
कोदो कुटकी धान जुँवारी, उपजे खेती खार।
आलू भाँटा मिरचा धनिया, केरा हवय कछार।।
कच्चा लोहा खनिज संपदा, चमके हीराखान।
चमकत हावय सूरुज जइसे, छत्तीसगढ़ महान।।
-तोषण चुरेन्द्र 'दिनकर'
धनगाँव डौंडीलोहारा बालोद छत्तीसगढ़
📱9575070689 6267538036
कोई टिप्पणी नहीं:
एक टिप्पणी भेजें