महतारी के महाकाव्य
अचरा हर तोर रूख कस छँइहा, दुनिया के ताप बचाथे ओ,
तोर आँसू के एकक बूंद हा, अम्मरित कस भाग जगाथे ओ।
दया मया अमृत बरसाथे, जइसे बदरा भुइयाँ मा,
तोर गोदी आके महतारी, जम्मो थकान मिट जाथे ओ।
सरदी गर्मी बरसा ल सहिके, रहिथस खड़े पहाड़ कस,
हमर सुख बर तैं पी जाथस, जहर घलो महादेव कस।
गोरस हम ला तैंह पियाथस, दूध बना के अपन लहू,
तोर ममता के आगू लागय, अंधियार घलो उजास कस ।
तोर चरन के रज महतारी, तीरथ ले बढ़के हे पावन ,
तोर दुलार के छाँव ह जइसे, तपती धुप मा हे सावन ।
तोर लागा ला नइ छूट पाबो, जुग-जुग के हे ये नाता ,
तोर बिना ये जग अंधियारी, छोड़़ तोला कहाँ जावन।
समझ नइ पावय ईश्वर घलो, बढ़गेस तैं भगवान ले,
पथरा घलो ला मया म सींचै, काहत हवँव ईमान ले।
महिमा अपरम्पार हे दाई, सरसती हा लिखत थिहा जाही,
पर तोर ममता के महाकाव्य,सिरा नइ पाही जहान ले।
-तोषण चुरेन्द्र 'दिनकर'
धनगाँव डौंडीलोहारा
बालोद छत्तीसगढ़
कोई टिप्पणी नहीं:
एक टिप्पणी भेजें