शनिवार, 2 मई 2026

ममता के अमर कहानी

बरगी बांध के ये हृदय विदारक घटना के ऊपर  महतारी के मया के वो पराकाष्ठा ल दर्शावत पंक्ति  जिहाँ एक महतारी अपन लइका बर मौत ले भी लड़ जथे। इही भाव ल समेट के कुछ पंक्ति सादर समर्पित....

**ममता के अमर कहानी**

काल के गाल ले तोला बचावत,
जिनगी के जंग ला हार गेंव।
सोच रिहिस मोर राजा दुलरवा,
मौत ले बाजी मार तेंव।
एड़ी चोटी एक करेंव तोर जीव ल उबारे बर,
कोन जानत हे बिधि के बिधना जेन ल हाथ ले टार तेंव।
लहर अइसन उठिस चहुँ ओर, काल के साया छाय रिहिस,
ममता के आँचर म तोला, ममता ह कस के लुकाय रिहिस।
बरगी के ओ लहर मन म, मौत के तांडव नाचत रिहिस,
खौफनाक ओ मंजर देख के, मोर परान ह काँपत रिहिस।
बूडत नइय्या, लहरत पानी, कोनो बचावइया नइ दिखिस,
तोर सुघ्घर मुखड़ा देख के, डरे बर जगा नइ बचिस।
मोर आखिरी सांस कहय, बस तोला तीर म लाना हे,
ये भारी बिपत ले निकाल के, सुरक्षित तीर पहुँचाना हे।
सांस थमत गे धीर-धीरे, पर हाथ नइ ढीला करेंव,
तोर सुघ्घर भविष्य बर बेटा, मैं ह हँसत-हँसत मरेंव।
मोर हाथ के ओ पकड़ ह, तोर जिनगी के डोरी बनही,
मोर कोरा म सोए रहिबे, इही मोर आखिरी लोरी बनही।
अमर होगे ममता मोर, जब काल ह सर पटक के हारिस,
तोर मुस्कान ल देखे बर, ममता ह मौत ला ललकारिस।
भगवान देखिस ये निस्वार्थ प्रेम, ओकरो हिया ह पिघल गे,
माँ के बलिदान के आगे, साक्षात काल घलो पिघल गे।

तोषण चुरेन्द्र 'दिनकर'
धनगांव डौंडी लोहारा बालोद छत्तीसगढ़
9575070689/6267538036

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय