शुक्रवार, 20 मार्च 2026

दाई नवदुर्गा के महिमा

​🌺 दाई नवदुर्गा के महिमा 🌺

​नौ रात के पावन परब, नवराति हा आइस हे,

दाई अंबे हा नौ रूप म, अपन महिमा देखाइस हे।

पहिली रूप 'शैलपुत्री' माता, परबत राज दुलारी आय,

दूसर 'ब्रह्मचारिणी' दाई, तपस्विनी महतारी आय।


​तीसर रूप 'चंद्रघंटा' के, माथा म आधा चंदा साजे,

चौथा रूप 'कूष्मांडा' दाई, ब्रह्मांड रचिन, भवानी गाजे।

पांचम 'स्कंदमाता' हें, कार्तिकेय ल कोरा म लिन,

छठवां 'कात्यायनी' माता, महिषासुर ल मार दिन।


​सातवां काल ल नास करइया, कालरात्रि हें भारी,

आठवां रूप 'महागौरी' के, मंगल करथे महतारी।

नउवां रूप 'सिद्धिदात्री', सबो सिद्धि के खानी हे,

नवदुर्गा के महिमा ल, सबो देव मन मानी हे।


​लाल चुनरी, रोली, चंदन, दाई ल हम चढ़ावन,

सरधा अउ भगती के संग, गरबा रास रचावन।

सुख, सांति अउ बढ़ौतरी के, दाई असीस लुटाथे,

हर भगति के जिनगी ले, अंधियारी ल मिटाथे।


​घरे-घर जलथे अखंड जोत, गूंजत हे जयकारा,

दाई के दरसन पाके खुलथे, करम के सबो दुआरा।

हे नवदुर्गा, हे जगदम्बे, हमर ऊपर मया बनाय राखबे,

ए पावन नवराति म, सबो के पीरा ल खँचवा म पाटबे।


​✍️ : तोषण चुरेन्द्र 'दिनकर' गांव - धनगांव (डौंडीलोहारा) जिला - बालोद, छत्तीसगढ़ 

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय