बेटी अंव भारत के मोला प्यार चाही जी
मोर अचरा के लाज बचइय्या, मोर आंखी के आँसू पोछइय्या ,अइसन मोला संसार चाही जी
दाई के हावे बेटा दुलरवा, ददा के दुलारी हँव
दो कुल के मान राखँव, पुरखा के चिन्हारी हँव
राम खेले मोर कोरा म,सीता अवतारे हँव
बेटा बेटी दोनों बरोबर, संघरा मैं दुलारे हँव
मोर मितवा मोर हितवा परिवार चाही जी
मोर अचरा के लाज बचइय्या, मोर आंखी के आँसू पोछइय्या ,अइसन मोला संसार चाही जी
महानदी सोढूंर पैरी, अरपा के धार हे
रूख राई जंगल झाड़ी, करे हे सिंगार हे
धान के कटोरा मैं हा, झूमरे खेती खार हे
चंदा सुरुज मोर सँवदिया,खड़े पहिरादार हे
मोर बगिया मा गोंदा हरसिंगार चाही जी
मोर अचरा के लाज बचइय्या, मोर आंखी के आँसू पोछइय्या ,अइसन मोला संसार चाही जी
जतन करव मोर मिलके, छलनी होत हे छाती रे
नंदावत हे रीत संस्कृति, कइसे बचही थाती रे
कोन खेलही फूगड़ी फल्ली, गिल्ली भंवरा बाँटी रे
पिसाके धूर्रा हो जाही, चंदन कस माटी रे
सिरजाये गहना कस वो सोनार चाही जी
मोर अचरा के लाज बचइय्या, मोर आंखी के आँसू पोछइय्या ,अइसन मोला संसार चाही जी
©®
तोषण चुरेन्द्र 'दिनकर'
धनगांव डौंडी लोहारा बालोद छत्तीसगढ़
कोई टिप्पणी नहीं:
एक टिप्पणी भेजें