लाकडाऊन ह बड़गे हावय
जन जन लागे हे सोरियाय
राशन पानी सब्जी भाजी
कोन कोति कहाँ ले पाय...
दस ले जादा मत जावव संगी
बर बिहाव के बात हे आय
हबर जहू कहूँ पुलिस के हत्था
मन माड़े डंडा बरसाय....
कोन जनी का करम करेहँन
मुक्ति बने घलो नइ बन हे पाय
शमसान म लेगे खातिर
दस झन मनखे हावय जाय....
काम धाम घलो चलत नइहे
पइसा कोन कहाँ ले पाय
दार भात खाके गा जम्मो
लाकडाऊन मा जिनगी पहाय....
दू गज दूरी मास्क जरूरी
घेरी बेरी हाथ धोवाय
घर मा रहव सुरक्षित रहव
रात दिन हे हाँक पराय....
डोकरी डोकरा छोकरी छोकरा
कोरोना वैक्सीन लगवाव
काहत हे सरकार घलो गा
जम्मोझन हास्पीटल जाव....
सर्दी खंस्सी बुखार आये मा
डाक्टर ल तुरते देखाव
रोग ल झन लुकावव संगी
दवई पानी जल्दी कराव....
बात ल मानव तोषण के गा
सबोझन सहयोगी राहव
पल्ला भागे कोरोना हर
भगवान ल अतरी काहव.....
तोषण कुमार चुरेन्द्र
धनगांव डौंडी लोहारा
कोई टिप्पणी नहीं:
एक टिप्पणी भेजें