झलमला के गंगा मैय्या
पानी भीतरी ले सिरजे ओ दाई,गंगा मैय्या तै कहाये
झलमला धाम में बइठे भवानी,मोहिनी रूप सुहाये
मोहिनी रूप सुहाये
दिन सममार के तोर ठिहा मा,बइला बजार भराये
दूरिहा दूरिहा ले नर-नारी,बइला ल धर-धर आये
पानी पीये के तरइय्या नंइहे,कइसे के प्यास बुझाबो
जुक्ति बनाये गांव के मुखिया,सुग्घर तरिया बनाबो
तरिया बनगे पानी भरागे,सगरो के मन हर्साये,
जीवरा ह सबके जुड़ाये
पानी भीतरी ले सिरजे ओ दाई,गंगा मैय्या तै कहाये
केंवट भइय्या एक दिन संतो,मछरी जाल बिछाये
मछरी नंइ आवय जाल में मैय्या,पथरा ह दिनभर आये
पथरा समझ के केंवट भैय्या,तरिया मा फेर लहुटाये
पथरा के महिमा अगम समंदर, ककरो समझ नइ आये
माता के कहनी समझे नहीं गा,बइगा ल जाके बताये
महिमा पथरा के गाये
पानी भीतरी ले सिरजे ओ दाई,गंगा मैय्या तै कहाये
बइगा गुनिया गांव के मुखिया,पूजा पाठ करवाये
चौकी आसन ऊपर बिराजे,चंदा कस शोभा पाये
पानी ले सिरजे आदिभवानी,सूरूज हा गुन ला गाये
नाँव अमर तोर होगे ओ दाई,गंगा मैय्या कहाये
पुर पुरवासी झुमै नाचै,नवदिन जोत जलाये,
'तोषन' तोर जस ला गाये
पानी भीतरी ले सिरजे ओ दाई,गंगा मैय्या तै कहाये
गीतकार
तोषण चुरेन्द्र 'दिनकर'
धनगांव डौंडीलोहारा
कोई टिप्पणी नहीं:
एक टिप्पणी भेजें